Sit de coltura e attualità
in lengua milanesa		 Invia i tuoi messaggi a:
info@elmilanes.com






DOMÈNEGA IN ALBIS del Renato Colombo


Se parla semper de la Pasqua, de la domènega di Palm ò de Sant’Angiol, mi voeuri contav on quaicòss de la domènega in Albis; la domènega che ven dòpo Pasqua.
La tradizion la dis che i catecumen, che a la font battesimal aveven ricevuu ona candida tònega, simbòl de l’innocenza e de la grazia battesimal, dòpo che l’aveven conservada tutta la settimana e che l’aveven drovada per partecipà ai riti religios, la conservaven in la gesa doe aveven ricevuu el battesim.
Stà tònega la vegniva conservada in sagrestia, a ricòrd del sacrament ricevuu e quale pègn de fedeltà di promèss battesimai.
On stòrich de la fin del secol XVI ricòrda in sto dì ona devozion particolar di milanes vers la Santa Vergin Maria, soratutt dòpo che l’Arcivescov Gaspare Visconti l’aveva faa collocà in del 1592 ona immagin de la Vergin sora l’altar de la gesa de S. Maria al Castèll.
Stà gesètta, che la gh’è ancamò al dì d’incoeu, semper frequentada da tantissim fedei, l’hann ciamada al Castèll perché quand l’è stada costruida nel 1588 da i Agostinian, sora i rèst d’ona antiga gesa fada fà da Galeazzo Sforza duca de Milan, la fronteggiava el Castèll Sforzesch.
L’immagin de la Vergin traslada nel 1592 con la presenza de tutt el clero milanes, la provegniva da ona cappèlla provvisòria che gh’era appena foeura del Castèll e che l’era stada dipingiuda per vorè de Gian Galeazz Visconti.
El Signor de Milan l’aveva ottegnuu tanto confòrt, da quèlla dolza immagin de Maria in tutt i so tribulaa traversii, tant de vorè ciamala “Madòna de la Consolazion”, e tutt el popol l’ha semper invocada con tantissima devozion, anca in quei moment doe l’ondada antireligiosa, vegnuda dòpo la rivoluzion frances, la cercava de distrugg el sentiment religios.
Al dì d’incoeu s’è on poo perduda stà devozion per la Vergin de la Consolazion, l’è on peccaa desmentegass di nòster tradizion, ma se gh’èmm de fà l’è el mond moderno che purtròpp el gira inscì, mì hoo cercaa de fermall ma ghe son minga riessii, anca perché nissun m’ha daa ona man.
La domenega in Albis la se festeggia a Vignaa in doe sto mì de cà, ma con la Madòna de la Consolazion la gh’ha pròppi nient in comun, l’è ona festa civil minga religiosa che magari ve contaroo on’altra vòlta se fii i bravi… vedaroo…
25 APRIL, SAN MARCH

El vinticinch d’april l’è gran fèsta, se festeggia in tutta Italia, l’è el dì de la liberazion dal nazifascismo, ma a Milan gemò prima se festeggiava el 25 april, l’è San March, gran fèsta in la gesa dedicada al Sant in l’omònima via.

Gesa i milanes hann costruii in del 1254 in riconoscenza di servizzi ricevuu da i Venezian, l’era ciamada “San March l’è ona gran bèlla gesa” ò in brev domà “San March” e con stà esclamazion voreven pròppi dì che l’era bèlla come del rèst se pò vedè anca al dì d’incoeu. Ma poeu quaivun ghe giontava a complement “ma la Passion l’è on bèll geson” defatt la gesa de la Passion dòpo el Dòmm l’è la gesa pussee granda.

In la piazzètta alberada foeura de la gesa la se ten tuttora ona piccola fera.		 On provèrbi a propòsit de sto dì el dis “Se piov a San March e a San Grigoeu (9 de magg) l’uga tutta la và in cavrioeu” per indicà che se piov a la fin d’April e a l’inizzi de Magg, l’acqua l’impediss el normal svilupp di grappei d’uga.