Sit de coltura e attualità
in lengua milanesa		 Invia i tuoi messaggi a:
info@elmilanes.com













Dalle Cascine alla città 1861-2000,
Articol del 2004, del Pierluigi Crola

S. Giuliano Milanese dalle Cascine alla città 1861 - 2000

Cosa gh’hann in comun Danzi e Di Gemma (musica), Mazzarella (teater) e Barrella (letteradura)?
Che hinn ò hinn staa gent che l’ha faa tanto per la nòstra lingua e coltura, anca se vegneven del Sud, a testimonianza che i valor (identitari) hinn minga necessariament ligaa a la provenienza, ma al sentiment e hinn trasversai sia politicament che geograficament. Milanes se nass, ma soratutt se pò diventall, anzi spess l’è pussee facil el contrari: conossi on bordell de gent che l’è domà nassuda chì, ma che ghe spua sora ai nòster (e de conseguenza ai sò) radis, ma anca tanta gent “ariosa” che l’ha faa di nòst radis la soa bandera.
A sto ròsc de persònn gh’emm de giontà Stefano Sportelli, vun che, pur parlando el milanes a fadiga, le capiss pròppi ben e el s’è daa tanto de fà per promoeuv la coltura local, perchè ghe cred debon: direttor passionaa del nòster mensil, organizzador de ona mostra su la scòla de S. Giulian da l’unità al dì d’incoeu, e anca ricercador e “stòrich” di nòster loeugh, come dimostra la soa ultima fadiga (S. Giuliano Milanese dalle Cascine alla città 1861 - 2000), òpera de elogià per merit stòrich, ma anca identitari.
On liber interessant e approfondii ch’el fa l’analisi de circa un sècol e mezz de stòria de San Giulian cuntada sù in ona donzèna de capitol: San Giuliano a fine secolo, Si costruiscono nuove aule scolastiche (1900 - 1910), L’Italia e la grande guerra (1911 - 1920), Il fascismo in comune (1921 - 1930), Aumento demografico e lento abbandono delle campagne (1931 - 1940), Guerra, dolori e lutti (1940 - 1944), la ricostruzione (1945 - 1950), Boom demografico e urbanistico ( 1951 - 1960), Abbandono dei lavori nei campi (1961 - 1970), Si raggiungono i trentamila abitanti (1971 - 1980), Lottizzata la via Emilia (1981 - 1990), L’ultimo decennio (1991 - 1999). In sto liber chì troeuvom, oltra a relazion stòrich, anca documentazion de la vita de tutti i dì, de trasformazion sociai (come el passagg da la civiltà agricol -contadina a quella industriala, l’esplosion demografica, i cambiament urbanistich) ma anca de aggiornament politich (con l’elench minuzios di partii, di consiglier e di carich politich pussee important di ultim ann). Perfina notazion in apparenza secondari, hinn mai ordinari ò inutil, ma gh’hann ona fonzion importanta: per esempi, la gionta de la denominazion “Milanese” a San Giulian l’è nò domà un element statistich, ma el segna el passagg de capploeugh da Viboldon a San Giulian.
Spess i pubblicazion de stòria local hinn una lista noiosa de dati fregg bon domà per la statistica. L’è minga el cas de sto lavorà chì, on’òpera che la te ciappa, che te ingattia e indove i dati se fonden a la perfezion con la vos de la gent, creando òna stòria local che la diventa romanz e che se leg in d’on boff. I personagg e i loeugh lontan in del temp paren visin e familiar, la stòria de on comun come tanti alter la par on film ch’el passa luster ‘me on spegg denanz ai nòster oeugg. El merit de sto laô l’è minga de cercà domà in la capacità de comunicà del nòster Sportelli, ma anca in del sò approfondii lavorà de ricerca: giornai locai, archivi de tutti i tipi, pubblicazion e testimonianz dirett. Ona ricerca compagna la gh’avaria de vess indicada come esempi a quei che se occupa de sti argoment chì. On grazie profond da chi sangiulianes l’è nò ma voeur ben a la coltura!