Sit de coltura e attualità
in lengua milanesa		 Invia i tuoi messaggi a:
info@elmilanes.com






L’Università degli Studi di Milano
la Cà Granda del Marco Perego

L’Università di Studi de Milan la se troeuva in del edifìzzi de l’antìgh “Spedale dei Poveri“ vorsuu dal Francesco Sfòrza, Duca de Milan e da la soa miee Bianca Maria Viscont (sec. XV) in segn de gratitùdin per la conquista del Ducaa.
La prima prèia l’è stada pòsta el 12 de april del 1456. L’edifìzzi l’è stà completaa in del vòttcent, grazie ai donazion di cittadìn milanes (tra i pussee conossuu, gh’è el bancher Gian Pietro Carcano 1621).
Per fà sù pussee danee se organizzava on giubilee special (La festa del perdon) ògni duu ann el 25 de marz, festa de l’Annunciada che la protegeva l’Ospedal.
El progett l’era sta daa a l’architett toscan Antonio Averlino, ciamaa el Filarete (1400-1469). La pianta pensada dal Filarete la gh’aveva la forma quadrada, con ciar riferiment religios.
Al centro de la struttura l’è sta tirada sù la gesa. I part laterai, costituii da costruzion con la pianta a cros, inscì da ricordà la sofferenza umana, èren destinaa ai malaa.
Al centro de la crosera del quattercent in corrispondenza del tiburi se trovava on altar ch’el podeva vess vist da tucc. La Cà Granda l’era dotada de servizzi igienich (ciamaa destri) con soluzion grandios per l’epoca.
Oltra al Filarete, l’ha contribuii a la costruzion de la Cà Granda Guinforte Solari (1465-1481). L’Amadeo l’ha inveci progettaa il portich doppi, progett portaa innanz da G.B. Pessina in del 1634.
Cont el Pessina l’ha collaboraa el Richini, ideator del grand cortil baròcch e de la facciada de Via Festa del Perdono. La seconda crosera l’è stata mettuda in pee tra el 1886 e el 1701 e l’era la part riservada ai dònn. El perimetro esterno l’è sta finii in del 1797 dal Pietro Castelli.
La Cà Granda l’è stada per tanti ann l’esempi in Euròpa de struttura ospedaliera avanzada. L’è staa on ospedal fina a la seconda guerra mondial, quand in del ’43 i bombardament l’hann ridòtta in tanti freguj. A la fin de la guerra l’edifìzzi l’è sta assegnaa a l’Università de Milan in del 1949. El laorà de ricostruzion l’è terminaa in del 1958, portaa innanz da trii architett: Ambrogio Annoni, Liliana Grassi, Piero Portaluppi.
Al dì d’incoeù la Cà Granda la gh’ha: el Rettoraa, on quaj offizzi amministrativ e duu Facoltà umanistich (Giurisprudenza, Letter e Filosofia). Spess l’Università la diventa la sede di manifestazion colturai e di congress scientifich nazionai ed internazionai.