Sit de coltura e attualità
in lengua milanesa		 Invia i tuoi messaggi a:
info@elmilanes.com

















Bill Gates e i “centri sociai” hinn in apparenza oppòst, ma, a la fin de la fera, simil

Chi hinn i amis de la globalizzazion
Articol del 2003 del Pierluii Crola

La vera contrapposizion l’è tra chi el considera el mond come on paes soll e chi le pensa come a on crosoeu de diversità.

L’è pròppi vera che spess gh’è minga de fidass di schematizzazion tròpp sempliz: bon contra cattiv, democratich contra fascista, sciori contra poveritt, bianch contra negher, pubblich contra privaa. La realtà l’è tanti vòlt pussee complessa de tanti etichett e, soratutt, gh’emm de diffidà di apparenz perchè spess l’è vera el contrari: la Germania comunista la se ciamava Repubblica Democratica Tedesca, la corrent pussee “de part” di giudes la se ciama Magistradura Democratica, i ‘Merican che hinn intervegnuu in Iraq per motiv econòmich (el petròli) hann dichiaraa che s’hinn faa carich di diritti uman; inveci, semper per i diritti uman, hann lassaa che el Pinochet e sòci fasessen quell che hann faa in America Latina, oppur hann bombardaa el Milòsevic perchè el sterminava i Albanes in cà soa, anca se ai Turch, che hann faa i stess ròbb (e anca pesg) cont i Armeni e i Curd, adess ghe dann la medaja de democratich e ai Albanes che hinn adree a sterminà i Serbi e i Macedoni ghe dann i armi.

Tegní a ment che el nemis pussee pericolos, l’è minga quell dichiaraa, ma quell che te dis te vess tò amis, quell ch’el dis de ’vegh i tò stess ideai; i apparenz spess “te ciollen”, pròppi come quei che se disen tò amis.

On ragionament compagn l’è possibil fà per la globalizzazion: perchè, se da ona part troeuvom ona “brancada” de sciori che cont i sò danee voeuren dominà (e minga domà econòmicament) el mond, semm pròpi sicur che quei che se disen contrari (quei del “Social Forum”) el sien debon ?

Sti sciori chì hinn? Hinn in gran part i “galantòmm” di centri sociai, che hinn contra el sfruttament planetari di dèbol, contra la globalizzazion, ma domà quella econòmica: domà per quistion de danee, donca, hinn in contrast cont i padroni del vapor; per el rest hinn collega: se parlom da on pont de vista politich, social e coltural, la soa filosofia terzomondista, internazionalista e multietnica, pronta a combatt ògni identità, l’è fòrsi minga on concett globalizzant?

El vorè impònn a tutt el mond ona accettazion del modell afro- asiatich (domà perchè l’è on mond ideologicament compatibil con chi le sostegn) e di sò categorii (musicai, sociai, religios e de costumm) l’è minga on appiattiment ch’el fa el pari cont el vorè impònn on cert mercaa (e donca ona mòda) da part di padroni de la melonera mondial?

La sola differenza tra el Bill Gates e vun di centri sociai (el “Bill Gates di poveritt”) l’è che i sciori voeuren livellà el mond a tutti i livei, con particolar attenzion ai interess de chi gh’ha i danee, i contestador voeuren anca lor globalizzà el mond a tutti i livei, con particolar attenzion però a chi gh’ha pòcch danee: hinn complementar tutti e duu, anca se per motiv different, hinn di globalizzador che se moeuven per on’ideologia: quella capitalista i primm, quella marxista i alter.

La vera contrapposizion l’è minga donca tra duu soggètt in apparenza oppòst, ma, a la fin de la fera, simil, ma tra chi voeur la contrapposizion e chi la voeur nò, tra chi voeur on mond tutt compagn e chi voeur esaltà i differenz, tra chi considera el mond come on paes soll, ò, come se dis in d’ona lingua forestera, “un villaggio globale”, e chi pensa come a on crosoeu de diversità, a on miscmasc de lingu, coltur e tradizion da esaltà e conservà: la ricchezza vera, l’è, de fatt, formada da tanti color, bei ciar e nett, e minga da on color soll ottegnuu da tutti i color mes’ciaa insèma, la ricchezza e la democrazia vera l’è ona pluralità de scelta, mai ona scelta obbligada.