Sit de coltura e attualità
in lengua milanesa		 Invia i tuoi messaggi a:
info@elmilanes.com














La scòla l’è anmò in del nòster coeur
 Articol del 2004 de la Giulia Cerboni
La Mostra che la s’è svòlta al princippi de ottober, ben descrivuda in de l’articol chì sòtta, in del Comun de San Giulian Milanes relativa ai memòri scolastich a partì dal primm noeuvcent, l’è stada ona testimonianza concretta de come, quei moment inscì “odiaa” e mal vist quasi da la stragrand maggioranza di fioeu de ier e anca de incoeu, l’ha pur semper lassaa in del coeur de tucc nun, sentiment particolar, che s’hinn tajaa foeura on cantonscell in del nòster coeur; sentiment che vegnen foeura tutti i vòlt che la memòria la ghe pòrta indree in quei ann. E se poeu oltra che rivivi in di ricòrd, riessom a vedei, a toccai, allora tutt el diventa pussee meraviglios. I pènn cont i sò pennitt different, la carta suga, el stucc ò la bacchetta de la maestra chi i ha desmentegaa? Ò la cara stua che la riscaldava l’aula freggia e el banch che l’ospitava duu scolar in d’on spazzi piscinin, indove se gh’aveva de stà fermi per fòrza? Ò el carimaa fissaa in sul banch impienii d’inciòstrer tutti i mattin dal bidell?
Ecco on quai flèsc de ricòrd che la gent de San Giulian l’ha poduu ammirà in 15 dì de esposizion de sti document de scòla.
La Mostra ben organizzada da l’Offizzi Coltura del Comun, l’ha permiss inscì a la gent de ammirà de tutt, dai vegg pagell ai quaderni ingialdii, dai cartinn geografich che disegnaven on’Euròpa diversa da quella de adess a regolament scolastich sever e rigoros; insòma ona sequenza de ricòrd che l’ha faa colp in di coeur di pussee anzian.
Anca i scolaresch noeuv, che compagnaa dai sò insegnant hann visitaa la Mostra, s’hinn interessaa ai vegg oggett di sò nòni, curiosando tra i quaderni e i diploma e domandando spiegazion ai maester che je compagnaven.
L’è stada questa ona mostra foeura del temp, ona sfida a propònn on quaicòss che difficilment se pò vedè in alter sit; la massiacca presenza de visitador, a la fin n’emm cuntaa quasi quattermila, de tutti i età e condizion sociai, l’è stada la testimonianza che anca sta scòla strapazzada la gh’ha semper on sò pòst e ona soa valenza de gradiment in nun tucc.


Cent ann de scòla fra pennitt e fòto del rè: i oggett ricòrden come el studiava el nòno

San Giulian On sècol de banch, liber, sussidiari, register e quaderni l’è cuntaa sù in d’ona mostra che la descriv el passaa de la scòla. Ona succession de oggett e testimonianz indoe se pò vedè riflessa ona sostanziosa pagina de stòria italiana, in di sò aspett didattich, ma anca sociai e civii. El material de collezion l’è staa tiraa sù con cura da on insegnant de San Giulian, Stefano Sportelli, viceprèside de la scòla media Milani, che l’ha miss a disposizion el sò archivi personal in la mostra che l’è adree a mett in òpera personalment in d’ona sala del spazzi coltura de Piazza de la Vittoria.
L’esposizion, che la fa vedè “La scòla da ona riforma a l’altra: da l’Unità de l’Italia fina al dì d’incoeu”, la sarà averta al pubblich dal 27 settember al 7 ottober. “Tutti i ann - el spiega - in occasion de la festa de la città me sont mettuu in ment de organizzà on avveniment per i fioeu. Questa vòlta, hoo deciduu de mett a disposizion di cittadin ona mostra che la va guardada con calma, perchè grazie al material espòst, l’è possibil rivedè e ricordà ona serie de passagg che hann caratterizzaa i cambiament principai da la fin del 800 al dì d’incoeu”. A cambià hinn staa prima de tutt i fioeu: pòdom vedèi in fòto in bianch e negher, a pee biòtt, cont ona faccia pièna de stupor denanz a l’obiettiv; tra i oggett, poeu, pòden minga mancà i schiscett che se portaven per el disnà. Gh’è fina la bandierina che i scolar sventolaven quand el rè Umberto el vegneva in visita. Je vedom anca tucc insèma in la prima pagina de la “Domenica del corriere” del 24 marz 1901 al funeral del rè, che l’ha vist anca la partecipazion de tanti scòl de la zòna.
Ma, a cambià, insèma a la popolazion studentesca, hinn staa anca i oggett dopraa dai scolar. El carimaa, l’indispensabil boggetta de inciòster negher Pelikan, i pennitt, inscì come i calligrafii e i argoment di sò tèma in di settiman che vegnarann sarann miss a disposizion di visitador. Del rest anca i copertinn di liber e di quaderni descriven i epoch different che eren appartegnuu, dal period fascista al dì d’incoeu. In d’on canton l’è stada anca ricostruida on’aula del ’30, cont el sò banch de legn, la soa lavagna e la soa cattedra. Senza cuntà i cartinn geografich e i atlant che, ignorando i secession, tegnen insèma l’Euròpa del passaa, la Jugoslavia e la Russia. Ma on ciccin de attenzion la va anca ai insegnant che insubiven orgoglios i sò diplòma indoe eren elencaa tutti i materi, con tanto de voto, e in de l’aula se veden anca register pesant che comprendeven tutti i class. On panorama ch’el farà vegnì on poo de nostalgia a quei meno giovin e che mostrarà ai generazion noeuv come hann studiaa i sò coetani d’on temp. Ona mostra che la infolarmarà quei che hinn pù student da tanto temp, suscitando ona quai emozion sopida.

(tradòtt dal Pierluigi Cròla)

 

ARTICOI