Sit de coltura e attualità
in lengua milanesa		 Invia i tuoi messaggi a:
info@elmilanes.com





Bòtta e rispòsta con Paolo Leopizzi,
giornalista sportiv de Sky-tv. Artocol del 2004 del Roberto Mapelli

Lù el laora a Milan, ma el stà de cà in provincia; el troeuva differenz de vivibilità tra i dò realtà?
In provincia la qualità de la vita l’è pussee ottimal e congenial per ona persòna, in quant l’è men frenetica e stressant. Hinn tanti i ròbb che te avvantaggen in provincia, primm fra tucc l’affitt de cà, pussee accessibil, poeu el tran-tran de tutt’i dì pussee tranquill ch’el te aiutta ad affrontà el caos de Milan con pussee fòrza e vigoria. Purtròpp Milan la offriss minga di loeugh che te permetten on poo de romanticismo, forse a part i navili, ma mì che son minga milanes soo nò se la città la offriss alter.

Parlom del sò laô, perchè el football american el ciappa minga pee in Italia?
Mah, i perchè hinn tanti, ma pensi d’avènn individuaa quaivun, el primm el calcio l’è tròpp popolar, el second che la federazion l’è minga stada bòna de sfruttà i ann 80, quand el football american l’ha faa capolin in di cà di italian.

E adèss?
Adèss con Sky-tv sèmm a dree fà di sfòrz enòrmi per pubblicizzà sto spòrt. Gh’èmm numeros rispòst positiv che ghe dann incoraggiament e consapevolèzza che continoà l’è la ròba pussee giusta, però gh’hoo de dì che l’è ancamò dura.

Se l’è quèll che soppòrta minga del calcio?
Tutt quèll che gh’è intòrna a sto mond e che gh’entra nagòtt cont el folbal: bigliètt vebduu foeura di canai societari, marchandaise selvagg, parcheggi foeura di stadi gestii in manera approssimativa, competizion che l’è pù considerada on gioeugh, ma tutt’alter.
Basta pensà ai numeros giornai e trasmission che se disen sportiv, ma che parlen domà de ballon e i alter spòrt? el fann poeu in manera esagitada e inscì contribuissen a scaldà i anim di tifos pussee acces con tutti i conseguenz che ne deriven.

Podom dì, che el basket NBA e el baseball USA sarien di modei de ciappà a esempi?
Credi che domà la FNL (Lega Football Americana) l’è avanti rispètt ai alter, gh’è ancamò tant de fà. Speri che i temp podarien, per numm, vèss pussee ristrètt e che on’azion pubblicitaria ad hoc, la servaria a accelerà el cammin.