Sit de coltura e attualità
in lengua milanesa		 Invia i tuoi messaggi a:
info@elmilanes.com














Andà in biciclètta de la Emanuela Cancellieri

El ciclista autentich el se riconoss da la “spicciola” e dai “tòni” ch’el mett in mostra ai pontèi de la domènega, ma in tanti, pressapòch amador, in di mes primaveril salten in sella e se renden cunt de colp che ghe piasen i “dò roeud”. El mezzo de fatt el va ben per tucc: ona vòlta che vun da piscinin l’ha imparaa a pedalà el se desmentega pù, anca se, per diventà campion di salid ghe voeur el fiaa e on allenament costant. Per chi gh’ha minga tròpp pretes e voeur fà on poo de moviment la spicciola l’è l’ideal per stà a la serèna.

El ciclismo l’è on spòrt meraviglios perchè el concentra tanti aspett; el pò ‘vegh i caratteristich de ona pedalada tranquilla, oppur el pò ‘vegh, se se voeur “scimbiottà” i campion pussee important, caratteristich atletich elevaa oppur el pò vess anca on mezzo interessant per escursion e esplorazion, dato che gh’è tanti itinerari turistich che se pò fà in bicicletta, in Italia ma soratutt a l’ester (in Olanda gh’è ben 10.000 chilòmetri de percors ciclabil) e ona vacanza in bicicletta la pò regalà on straordinari carich de ricòrd.
Perchè ona vacanza in bicicletta l’è pròppi bella ma l’è necessari che ghe sien minga tròpp macchin intorna, per quest i ciclista hinn abbastanza pratich in del studià percors lontan di arteri pussee important, diventà, in tanti casi, di veri esplorador a la ricerca de località isolaa, tranquill, indove generalment manchen mai on allògg ospital e bòna cusina. Per ona vacanza piasevera se pò indifferentement scernì de costeggià el mar ò se pò ris’cià de ‘ndà in sui leggendari montagn di Alp, se pò pedalà soll godendos el paesagg oppur andà foeura in compagnia per gustà insèma la stessa passion.
Si pòden rifà i strad indove hinn staa scrivuu i pagin eròich de la stòria del ciclismo, ramperà su per i montesèi pussee in pee indove hinn passaa atleta che hann faa i sfòrz pussee dur in di condizion peggior. Se, ad esempi, se riva in sul Izoard, dòpo avè traversaa on paesagg difficil, con di picch roccios che se drizzen su on terren sècch e carsich, se pò vedè voeuna de sti pagin scrivuda su ona targa che La rappresenta Coppi e se pò anca visità on museo piscinin con patetich immagin stòrich dove dominen i figur de Bartali e Coppi.
El ciclismo l’è on spòrt ch’el fa ben a tucc, sia a quei che doperen la spicciola come mezzo de traspòrt per andà a scòla ò in offizzi sia a chi se mett a la proeuva in gar de la domenega ò in escursion pussee impegnativ perchè el stracarega minga i muscol e i articolazion, el tegn in allenament el sistèma cardiovascolar e soratutt, consentendo ona notevol gradualità de l’impegno, el se adatta ai condizion fisich de ciaschedun.
Sia che se decida de fà domà on poo de moviment in bicicletta, sia che se programma ona vacanza, l’è in tutti i maner importanta la scelta del mezzo, i biciclett del dì d’incoeu hinn di veri gioièi che sfrutten al massim el sfòrz e vutten campion e passionaa a redù el consumm de energii e a pedalà con pussee efficienza; l’è donca essenzial scernì ona spicciola bella, leggera, fada su misura, ma anca de on bell color e poeu, una vòlta scernida, montà in sella, pront a partì cont el mezzo de traspòrt pussee econòmich, ecològich, san e silenzios che esista.