Sit de coltura e attualità
in lengua milanesa		 Invia i tuoi messaggi a:
info@elmilanes.com



El barbon di navili
testo e musica di Mimmo Dimiccoli
Ona nott per amor disperaa su la ripa de Pòrta Cines
con la nebbia l’era el pòst ideal per mazzamm e levamm on gran pes.
Scarsa la lus, on silenzi mortal, me pòrti giò a duu pass dèl canal,
sari su i oeucc, me foo el sègn de la cros, ma dal Navili ven su ona vos:

Oeih vigliacch, guardom mi, hinn des ann che son chi
sotta i pont senza on lett ne ona cà,
per i donn gh’hoo pù nient, vivi de carità
ma l’è mèj fa el barbon che crepà!
D’ona robba son sicur, te le dis on amis :
Chi ‘l se copa el và nò in Paradis!
Damm a trà, và a dormì, te see gioin per morì,
fa nò el stupid e ricòrdes de mi.

Senza nanca rispond scappi via cont on fregg in di òss, stavi mal,
ma ‘l ciarìn d’ona veggia osteria de lontan el pareva ciamamm.
Me infili denter ancamò agitaa, bevi on grappìn e ricominci a fiadà,
l’ambient l’era pien, gh’era gent d’ògni età: vun che’l sonava e tucc a cantà!

Mi soo nò me l’è staa, ma me son trovaa là
dòpo on poo insèma a lor a brindà,
l’è staa inscì che ho capii quell che ‘l vecc el m’ha dii:
In de la vita se dev anca soffrì!
Questa amara realtà la m’ha faa medità
dal barbon di navili son tornaa,
gh’ho portaa de mangià, dòpo avèl ringraziaa
e comòss a l’ho basaa.

Premio Danzi 1975/76