Sit de coltura e attualità
in lengua milanesa		 Invia i tuoi messaggi a:
info@elmilanes.com






















...el BIAGIO ANTONACCI
de la Sonja Annibaldi

Ona conferenza stampa in stile grandios, organizzada in on prestigios spazzi milanes de l’altrettant illuster padron de cà Giorgio Armani, tanti giornalisti e ospiti important, tra l’alter Teo Teocoli e Laura Pausini, gh’eren lor ma anca i genitor, sò fradèll Graziano e tanti amis. El musicista milanes Biagio Antonacci l’ha festeggiaa inscì l’ultim cd “Convivendo”, in dì negòzzi da on para de settiman. On cd con tanta intensità che se avval d’ona marcia in pù: inizialment i tòcch de l’album avarien dovuu vèss 16 ma l’artista l’ha scernii ona noeuva formula per el mercaa discografich italian e i cd hinn diventaa duu, ma al prezzi de 10.90 euro ognidun inscì “Convivendo II” el verrà pubblicaa a dicember.

Biagio, te podet spiegà mej el perchè de stà scelta?
Vorevi offrì a la gent che l’ama i mè canzon la possibilità de spend 10.90 euro a la vòlta, per
ògni pubblicazion. Hoo minga voruu svend la mia musica, ma de dà la possibilità ai giovin de metabolizzala in del temp, sia dal pont de vista econòmich che artistich.

Perchè te deciduu de intitolà i dò produzion Convivendo?
Gh’hoo avuu manera de riflètt sora i difficoltà de la vita de tutti i dì a duu. La convivenza l’è on’esperienza difficil da affrontà, minga domà dal pont de vista affettiv, ma anca a l’interno de la stèssa società.

Come te cattaa foeura i tòcch de mètt in di cd?
Questi primm vòtt che trovarii in de l’album eren gemò pront, i alter avarien dovuu vèss completaa in la stesura di tèst. Sicurament, in del cors di pròssim mes, riessaroo a vèggh pussee temp per “vestì” i alter canzon. Intanta, speri, che la gent la se innamora de sto primm capitol.

La covertina de l’album l’è pròppi bèlla i color hinn cald e l’immagin semplizi in doe l’è stada scattada la fotografia?
A Bològna, la città in doe sto de cà da quand hoo lassaa la cà de Rozzan( MI ) in doe vivevi con la mia familia. Con quèlla fòto hoo voruu propònn di loeugh che hann come denominator comun, la vita de tutti i dì vissuda cont estrema semplicità.

Chì l’è la tosa che gh’è su la covertina insèma a tì?
La se ciama Giorgia Sinicorni e l’è ona modèlla. Oltre a vèss bèlla la gh’ha anca ona vos abbastanza interessanta, per quèst hoo deciduu de fà introdù da lee el cd cont on brev parlaa (convi-intro)

In de l’album ritroeuvom l’aria di ann 80, ballaa, del sound ingles, ma son restada colpida da on tòcch assolutament “celentanesco” par de risentì el mitich clan ai cor!
Sì te se dree parlaa de “Mè pader l’è on rè” in doe se conta la stòria de on princip che se innamora de voeuna de campagna. L’è ona canzon razzista. Ancamò al dì d’incoeu purtròpp gh’hinn barrier sociai e econòmich che hinn d’intralc, per esempi, el matrimòni tra l’erede d’on imper industrial e la tosa d’on operari. La scèrna di còr la ricalca effettivament el mond de Adriano Celentano, che l’è pròppi el mè idol.

Con sto noeuv laorà te ghe regalet on mond distant da i tò recent succèss come “Quanto tempo ancora” “Iris” “Ritorno a amare “ e “Angela”...
La mia musica l’è in continoa evolozion, me pias minga ligass a on clichè inuch.

Perché te voruu ripropònn “Il fiume dei profumi” che te avevet scritt nel 92 per Mia Martini?
Perché la m’ha portaa fortuna, a dispètt di cattiveri ch’hinn staa dii e scritt sora de lee.
L’è andada inscì. L’aveva sentii parlà de mì e la voreva che ghe scrivèssi ona canzon.
El tòcch l’è nassuu al pianofòrt, la vigilia de Natal. La stòria la conta d’on soldaa che, durant la guèrra in Vietnam, el scriv a la soa dòna e ghe promètt che l’avaria sposada ona vòlta finii la guèrra.
Ricòrdi ancamò quand Mimì l’è vegnuda a mangià a cà di mè genitor. L’è restada colpida da mia mama.
Dòpo mangià l’ha scoltaa la canzon e la ghe piasuda tantissim, l’ha deciduu de inserila nel so disch, che poeu l’è vegnuu foeura nel gir de pòcch settiman.
Pòcch temp dòpo mì hoo pubblicaa el mè terz album “Liberatemi” grazzie al qual gh’hoo avuu el primm ver succèss.

Ghe gemò on tò concert fissaa per el 17 de magg, al Forum de Assagh.
La partirà da quèlla data la vera tournee?
Probabilment dòpo ghe sarà qualche concert d’alter ma el tour partirà nel mes d’ottober.
Per adèss pòdi svelav nient, per quèlla serada.
Lì gh’avaroo manera de favv entrà completament in del mè mond.
Ve racconteroo tutt quèll che l’è succèss in stì duu ann de silenzi.

Tanto silenzi, quand te laoret minga, te spariset mai ona fòto, nissuna notizia...
“Son staa impegnaa a scriv canzon, ma in ògni manera l’è difficil trovamm in gir per fèst e eventi mondan.
Son tròpp riservaa e quand laori minga resti cont i mè fioeu”.

Còsa significa per tì tornà a sonà a Milan?
El gh’ha on grandissim significaa. Te vedet a Bologna la qualità de la vita l’è straordinaria, e l’è bèll fà crèss i tò fioeu in on pòst simil, però la mia città l’è Milan e quand ghe torni me par de respirà anmò mej, nonostant sia pussee inquinada, e poeu gh’hoo tantissim ricòrd a propòsit del Forum! Per esempi me pader, Paolo Antonacci, l’ha laoraa lì per tanti ann, ma prima ancamò al pòst del Forum gh’era on grandissim praa doe numm bagai de Rozzan portavom i tosann in Camporèlla, insòma per fala corta, credi ch’el pòrta bon comincià ona tournee da quèll pòst, perché el me dà la carica giusta e me infond tantissim coragg.