in lengua milanesa
info@elmilanes.com
|
|
|
Sit de coltura e attualità in lengua milanesa |
Invia i tuoi messaggi a: info@elmilanes.com |
|
Seguitt 03...   |
...l'ENRICO LOMBARDI del Pierluigi Crola - intervista del 2004 Considerèmm la quistion da on alter ponto de vista: Amsterdam la fa i danee minga quattando i canai, ma valorizzandoi, Milan el pensa a fà i danee quattando i navili e modificando, in pesg, l’ambient ch’el sta intorna. Quest l’è inevitabil perchè Milan el gh’ha on’importanza economica e finanziaria maggior de la città olandesa, oppur tutt quest el succed perchè in di paes del nòrd se pò minga considerà l’aspett econòmich senza tegnì cunt di valor estetich e identitari? A part el fatto che credi minga che Amsterdam la sia ona città meno importanta de Milan dal ponto de vista econòmich-finanziari, sont sicur, inveci, che a Milan la s’è impòsta ona coltura de la superficialità, del “tanto al tòcch”, de l’approssimazion e de la mancanza de rispett per tutt quell che l’è pubblich, che la considera nò el fatto che quell che l’è pubblich l’è de tucc e donca el dovaria vess conservaa per ben. Ma quand per stupid vandalismo se impiastren i mur, per maleducazion se bordeghen i marciapee, per total impertinenza se descarega ògni gèner de ruu, anca ingombrant, in di cors d’acqua, quand l’amministrazion l’è minga bòna politicament, de eliminà sti offes a la città, che cosa pòdom sperà rispett al problèma di Navili, tanti bei paròll, ma fatti nisba. Staremm a vedè se i iniziativ tanto enfaticament cominciaa portarann a on quaicòss de concrett ò sarann, anmò ona vòlta, promess de sart ò, mèj, ... de politich. Hoo scoltaa, a vun di convegn organizzaa per dà l’inviada al progett de recuper di Navili Grand e Paves per poeu collegà Locarno con Venezia, dì da vun di relator che ghe voreva tecnich e politich de la bassa Italia per dà l’inviada a sta iniziativa, come se i milanes, che hann daa vita in di sècol a sto modell de efficienza fudessen minga bon, se dotaa di risors necessari, gestii, inveci, per la gran part da milanes “arios”, de ridà splendor a vun di monument che l’è el sò orgòli pussee grand, disaria squas quanto el Dòmm. Per conclud, credi che l’è minga domà on fatto de identità, credi, inveci, che la quistion la sia molto pussee venal; vun el se ricòrda de Milan domà quand gh’è bisògn de danee; sta città l’è domà on limon de spremm, senza che ghe torna indree, anca domà in piccola part, quanto gh’hann portà via con la scusa de la solidarietà (ad esempi, per parlà domà de adess, i famos 192 milion de Euro promettuu dal governo, hinn mai rivaa perchè hann dii che eren giamò inclus in finanziament misterios e minga ciar); in bòna sostanza Milan l’interessa a pòcch, inveci numm milanes segutom a prodù e a versà “limòsin” sostanzios al Stat central, senza che quest el ricambia, come saria normal, i istanz che la città la fa per la difesa di sò testimonianz. Se per on vers i navili hinn trascuraa per l’alter però se seguta a parlà de l’argoment e de propòst noeuv per salvai, senza cuntà video e testimonianz del sò passaa glorios. L’è domà propaganda o gh’è debon on interess sul tèma? Me par de podè affermà che da ona desèna de ann , e credi pròppi che la nòstra Associazion, l’Antiga Credenza de Sant Ambroeus, l’abbia svòlt ona fonzion primaria, l’interess per Milan e la soa stòria el sia on ciccinin cressuu. Pòdi certificà quest dal moment che personalment foo di cors informativ su sti argoment chì a certi istituzion per anzian - al contrari, purtròpp, l’assenza di giovin l’è total, ma speri domà che l’è perchè molti giovin incoeu gh’hann de fà front a di problèma seri e la partecipazion a sti iniziativ la continoa a cress. Su sta linea de rivalutazion de Milan e del sò passaa hinn staa ultimament propòst anca progett per riscoprì i Navili, in particolar l’attivazion de on itinerari ch’el collega Locarno con Venezia, percorrendo in del tòcch central, dal lagh Maggior al Pò, el lett del Navili Grand e de quell Paves. On progett certament ambizios, che l’ha portaa a la stesura de on pian operativ, sviluppaa in collaborazion cont el Politecnich de Milan, che l’intend propònn e “cribbià” ona serie de intervent indispensabil per ristrutturà i lett di duu Navili e i relativ laorà speciai, conch de navigazion, sfiorador, laorà de derivazion, eccètera. In sta propòsta, che la podaria ‘vegh anca on certo valor econòmich, stòrich e estetich, hoo intuii, e speri de sbagliamm, che podaria vessigh oltra a fattor purament tecnich, anca on’interessada attenzion da part de la politica che per ona soa visibilità, la voraria trass denter in l’iniziativa, creando on gir de interess particolar che semm tròpp ben dove pòden portà. L’è assee pensà a l’esperienza de la famosa leg per levà l’inquinament di comprensòri del Lamber, Seves e Olòna, sbandierada per tanti ann e poeu miserament finida in nient. Per conclud, me piasaria conoss on parer qualificaa su on fatt che me interessa molto: i navili hinn domà el spegg de on mond che l’è adree a sparì come i cà de ringhera e i cassinn oppur, al pari de la nòstra cara lingua, se pòden rinnovà magara modificando la soa funzion originaria? Me auguri, ma dipendarà anca dai milanes che dovarann sorveglià, rendendos cunt de la soa presenza, che i Navili gh’hann minga de scomparì, anca se ricòrdi come in del passaa l’è stada propòsta ona quai ipòtes per utilizzann el lett per scòpi completament different, trasformandoi, per esempi, in sedi per metropolitann, modificandon, come l’è facil intuì, la tendenza originaria. Credi che doprai per fini turistich saria senz’alter possibil, minga domà per viagg longh (Locarno-Venezia), ma anca per viagg pussee curt, hoo giamò ricordaa la circolazion di battèi in sul Brenta per visità i famos vill del Veneto, collegando sit de la città dove incoeu se pò rivà domà cont i mezzi de superfice, otomobil ò servizzi pubblich su ferr ò gòma, attivando el collegament con sit de interess general, estendendo, dove possibil, la navigazion a alter cors d’acqua, anmò present in sul territòri, per mezzo de curt tocchèi de canalizzazion. Se pòden senz’alter organizzà percors in sul Canal de la Martesana, collegandol, se del caso, con quell de Paderno, andando sù per on quai chilòmetro per el lett de l’Adda, in d’on paesagg de bellezza unica. Alter iniziativ podarien preved la riattivazion de sit particolar di antigh circuiti cittadin, ricòrdi per esempi el possibil collegament de l’antiga Conca de Nòstra Signora del Dòmm con la Darsena de Pòrta Ticines, el portà acqua, cont on circuito interno, a la Conca de l’Incoronada, arent al Pont di Gabell, a la fin del Navili de la Martesana. Altertant degn de interess sarien percors guidaa in sul Navili Grand e Paves, ricreando el spirit de ona vòlta del famos “Barchett de Boffalora”. E me fermi chì, perchè, se andemm avanti con la fantasia, podarien vess on badalucch i percors e i iniziativ che, sostegnuu da finanziament adatt, se podarien attivà con la certezza che numeros rosc de turista interessaa ammortizzarien in pòcch temp.
|
